អន្តរជាតិ៖ រដ្ឋាភិបាលនូវែលសេឡង់បានឱ្យដឹងនៅថ្ងៃអង្គារ ទី១១ ខែមិថុនានេះថា រដ្ឋាភិបាលបានសម្រេចបញ្ជូនកម្លាំងយោធាចំនួន ៤១នាក់បន្ថែមទៀតទៅកាន់បេសកកម្មរបស់អង្គការសហប្រជាជាតិ តាមបណ្តោយព្រំដែនតំបន់គ្មានយោធា​ (DMZ) ដែលជាទីតាំងដ៏មានភាពតានតឹងបំផុតរវាងរដ្ឋាភិបាលកូរ៉េខាងជើង និងកូរ៉េខាងត្បូង ខណៈដែលនូវែលសេឡង់កំពុងសម្លឹងមើលការបង្កើនតួនាទីរបស់ខ្លួនបន្ថែមនៅក្នុងបេសកកម្មអន្តរជាតិ។

រដ្ឋមន្ត្រីក្រសួងការពារជាតិលោកស្រី Judith Collins ថ្លែងថា ការសម្រេចចិត្តបង្កើនវត្តមានយោធារបស់នូវែលសេឡង់ពីចំនួន ១២នាក់ដល់ ៥៣នាក់នៅកងវរសេនាតូចសន្តិសុខបញ្ជាការអង្គការសហប្រជាជាតិ បានឆ្លុះបញ្ចាំងពីការប្តេជ្ញាចិត្តរបស់ខ្លួនក្នុងការគាំទ្រសន្តិភាព និងស្ថិរភាពនៅលើឧបទ្វីបកូរ៉េ។

លោកស្រី Collins និយាយបន្តថា អាណត្តិសម្រាប់ការដាក់ពង្រាយកងកម្លាំងរយៈពេលយូរអង្វែងទៅកាន់កូរ៉េខាងត្បូង នឹងត្រូវបានបន្តពន្យារពេលរហូតដល់ខែកញ្ញា ឆ្នាំ២០២៦។

នាយករដ្ឋមន្ត្រីនូវែលសេឡង់ លោក Christopher Luxon បាននិងកំពុងធ្វើការងារចាំបាច់ជាច្រើនដើម្បីបង្កើនការចូលរួមជាអន្តរជាតិរបស់នូវែលសេឡង់ ចាប់តាំងពីលោកបានស្បថចូលកាន់តំណែងកាលពីឆ្នាំមុន រួមទាំងការបញ្ជូនកម្លាំងសន្តិសុខដែនសមុទ្រទៅកាន់សមុទ្រក្រហមជាដើម៕